雷達顯示屏.

zoom 過 d 睇下.

目標方位儀 (Target Bearing Indicator),我都唔知佢點用既,不過應該係用黎顯示目標(敵艦)方位,將資料轉俾火炮組做野.

艦橋正面是有玻璃窗密封,而左右兩邊係可以通出去外面一個開放式既外圍艦橋,用黎觀察艦隻兩邊既情況.下面係艦橋既右邊通出去外圍艦橋既通道.





補充一張艦橋既照片,會較易明白外圍艦橋既位置,不過只得左面而唔係上面既右通道.

右外圍艦橋一個觀察位.如果可以响呢度整兩打冰凍啤酒約幾個令女上黎爸啤橋就正呀!

右面外圍艦橋上一支燈,不過唔係探射燈而係訊號燈,睇下佢左手有隻雞翼把手就知道.

由艦橋正前方大玻璃窗有蓋地方望入艦橋.

望到果部叮叮機同佢左手便隻軚.

再望過 d 有個好似上海街單眼佬涼茶隻涼茶銅煲咁既野,應該係隻水平羅更黎既.

由外面望入去艦橋度,重見到有支單筒望遠鏡,而家呢支野肯定好值租.

好勒,而家去睇睇呢個 CIC 房勒. CIC 就係 Combat Information Center 既簡稱,即係作戰情報中心,當戰艦遇敵時就由這里監控搜集和綜合所有敵我雙方的行動數據,然後作出合適的對應部署迎敵.

睇完艦橋部份不如轉去睇機房,不過事前聲明一下,機房其實冇咩野好睇,唔係我做領隊唔稱職,而係影相果位大佬只係影 d 林審野,冇同戰艦副偈影相大頭,於是連我咁勤力好學既都話冇計.

蘇利雲號驅逐艦既動力係先用 4 隻大鍋爐燒滾 d 水做成蒸氣,再利用水蒸氣推郁兩副渦輪機,一部轉郁一隻螺漿,於是就可以打叮叮開呠呠船勒.

下面睇睇果隻蒸氣渦輪機.

蒸氣渦輪機首先經過一個減速牙箱再轉動條濕.

戰艦上面所有動力來源就是蒸氣,圖中左面的一個蒸氣渦輪帶動右面的一隻電球,即是發電機,於是轉動炮塔有電,沖涼水泵有電,似依凍房有電,睇書寫信有電,老細嗌咪有電,雷達有電,全世界都有電.

鬼佬之所以先進,主要係有腦呢個唔在講,而當中最重要既一點就係有銀!如果淨有腦而冇銀莫財既話,得個愛因斯坦但係冇錢做實驗都係得個講字.

好似美國佬明白戰艦上面咩都靠士點(蒸氣, steam),如果有日黑仔起上黎壞左又如何?拿,人家有腦又有錢又唔同講法勒 ~~~ 車,我重以為係咩差野咁 Q 緊張?直頭 as easy as ABC 啦!咁咪加個 plan B 羅,橫掂老豆大把!於是乎就加 d 錢整左個後備油渣發電機出黎士釘拜勒.

備用柴油發動機組.

呢隻有個大牙轆既叫做 SOOT BLOWER ,係用黎吹走士點爐入面因長期燃燒而剩低 D 煤屎既,或者可以叫佢做除塵機,吹走煤屎可以維持士點爐既輸出功率.

戰艦的供電總掣檯.

好勒,跟住就冇咩機器可以睇得到勒,全部都係 d 閘掣堂環同錶等等,不過都照抄 d 出黎大家望望,咪以為細佬年尾蛇王.